काठमाडौँ, १९ असार : गायिका एलिना चौहानलाई सामाजिक सञ्जालमार्फत गाली गलौज र दुव्र्यवहार गर्नेमाथि अनुसन्धान गर्न तीन दिनको म्याद थप भएको छ ।
गायिका चौहानले दिएको जाहेरीका आधारमा चितवनको भरतपुर महानगरपालिका १० घर भई हाल ललितपुरको गोदावरी बस्ने ३३ वर्षका गुञ्जन राईलाई प्रहरीको साइबर ब्यूरोले पक्राउ गरी आज काठमाडौँ जिल्ला अदालतमा पेश गरेको थियो ।
अदालतको आदेशले विद्युतीय कारोबार ऐन २०६३ को कसुरमा छानबिन तथा अनुसन्धानका लागि ब्यूरोलाई ३ दिनको म्याद प्राप्त भएको ब्यूरोका प्रवक्ता, प्रहरी उपरीक्षक दीपकराज अवस्थीले जानकारी दिनुभयो ।
उहाँले भन्नुभयो, “प्राविधिक विष्लेषण र अनुसन्धानबाट उक्त घटनामा राई नै संलग्न रहेको पाइयो, धेरै आइडी बनाएर यस्ता गतिविधि पनि गर्ने गरेको पाइएको छ, उनीमाथि अनुसन्धान जारी छ ।”
उहाँका अनुसार राईले चरित्रहत्या हुने गरी पीडितको तस्वीर र भिडिओसमेत पोष्ट गर्ने र पीडितकै फेसबुकमा समेत गालीगलौज गरी चरित्रहत्या हुने खालका विषय कमेन्टबक्समा पोष्ट गर्ने गरेको पाइएको छ ।
गायिका चौहानले आफ्नो फेसबुक स्टाटसमा चरित्रहत्या हुने गरी कमेन्ट गर्ने गरेको उल्लेख गर्दै यही असार १६ गते ब्यूरोमा जाहेरी दिनुभएको थियो ।
गायिका चौहानले यो आफ्नो मात्रै लडाईं नभएको, चरित्रहत्या गर्ने अधिकार कसैलाई नभएकाले साथ दिन सार्वजनिक अनुरोध समेत गर्नुभएको छ ।
