काठमाडौँ : नेपाल ललितकला प्रज्ञा–प्रतिष्ठान तथा स्वामी विवेकानन्द साँस्कृतिक केन्द्र, भारतीय राजदूतावासको संयुक्त आयोजनामा आजदेखि काठमाडौँको नक्सालमा नेपाल भारतका कलाकारहरुले तयार पारेका कलाकृतिको प्रदर्शनी सुरु भएको छ ।
‘रामायण : साझा धरोहर’ शीर्षकमा भएको उक्त प्रदर्शनीको संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे र नेपालका लागि भारतीय राजदूत नवीन श्रीवास्तवले उद्घाटन गर्नुभयो ।
उहाँहरुले यस्ता कला प्रदर्शनीले दुई देशको संस्कृति आदानप्रदानमा योगदान पुग्ने बताउनुभएको थियो । उहाँहरुले आजै कला प्रदर्शनीको अवलोकनसमेत गर्नुभएको थियो ।

नेपाल ललितकला प्रज्ञा प्रतिष्ठानका कुलपति नारदमणि हार्तम्छालीले पछिल्लो समयमा प्रतिष्ठानले विभिन्न देशसँग मिलेर कला प्रदर्शनी आयोजना गर्न थालिएको र यसले संस्कृति आदानप्रदानसँगै पर्यटन प्रवद्र्धनमा समेत सहयोग पुग्ने बताउनुभयो ।
यस्ता प्रदर्शनीनले एक अर्काको कला सिर्जनाको सिकाईसमेत आदानप्रदान हुने र संस्कृति बुझ्ने मौका समेत मिल्ने बताउनुभयो । प्रतिष्ठानका सदस्यसचिव देवेन्द्र काफ्ले थुम्केलीले प्रतिष्ठानले देशभित्रै र विदेशमा समेत आफ्नो गतिविधि फैलाउँदै लगेको र यसले ललितकला क्षेत्रलाई रुपान्तरण गर्ने योजना सार्थक बन्दै गएको बताउनुभयो ।
यही असोज १४ गतेसम्म हुने प्रदर्शनीमा नेपाली ४ कलाकारका ५ कलाकृति र भारतका ३० कलाकारका ४२ कलाकृति राखिएका छन् । भारतीय कलाकार गार्गी सेठ क्युरेटर तथा डाइरेक्टर रहनुभएको यस प्रदर्शनीमा रामायणसम्बन्धी कलाकारहरुले चित्र सिर्जना गर्नुभएको छ ।
प्रदर्शनी उद्घाटन समारोहमा नेपाल ललितकला प्रज्ञा–प्रतिष्ठानका कुलपति नारदमणि हार्तम्छाली, सदस्यसचिव देवेन्द्र काफ्ले थुम्केलीलगायत प्राज्ञ परिषदसदस्यहरुको सहभागिता रहेको थियो ।
